الناس بقى مالها ؟؟؟؟
كفرت بامالها
هجرت اعمالها
وازداد اهمالها
واتغير حالها
زغلول كان قالها
واللا مافيش فايده
والناس بقى مالها ؟
الناس تعبانه
الناس زهقانه
وبطونها جعانه
م الجوع فجعانه
عايزه وخجلانه
قوله اه يانا
بقى هي السايده
والناس بقى مالها ؟
الغلا بهدلها
والفقر قاتلها
والعجز ذاللها
فى هموها بتلها
مش لاقيه دليلها
والحاله اديلها
اجيال واهى زايده
والناس بقى مالها ؟
الحاجه والعوزه
بقو زى الجوزه
لازقين فى البق
والهم نافيهم
وبرغم مافيهم
على بعض تنق
والناس بقى مالها ؟
القسوه ماليتها
والغيره كالتها
ولاعادش حيلتها
ما يسد رمقها
كان قبلا جبينها
بيسدد دينها
واهو طالع دينها
مش كافى عرقها
والناس بقى مالها ؟
اليأس ازداد
والامل انهار
وعطشهم زاد
رغم الانهار
شايفين الليل
ما طالعلو نهار
والناس بقى مالها ؟
الجوع بيقرص
والبرد يرصرص
وجناح متقصقص
ولا حد يخلّص
كله بيتملص
لو شر تزود
لو خير بتنقص
والدنيا البمبى
جايه بتترقص
لاحياه بتشجع
ولاموت بيخلص
والناس بقى مالها ؟
ماتقول بتشائم
ماتقول بتلائم
ولا عاتب لائم
مش ناقصه شتائم
الليل بقى دائم
والشمس ماقايده
والناس بقى مالها ؟
ليست هناك تعليقات:
إرسال تعليق